不幸事件發生後，到底應唔應該睇有關嘅新聞影片同資訊？

睇住成個巨 Mon 跌落嚟砸住個人，震驚、焦慮、傷心、忿怒，甚至瞓唔安食唔樂，發惡夢，腦海不斷重複一啲片段。。。短期內有呢啲不安嘅反應，都屬正常，大部份人慢慢隨時日安定下來，接受自己心裡唔舒服，同人傾吓，保持正常嘅起居生活。

睇片睇相睇新聞，不安唔舒服。從心理學嘅角度，到底應唔應該睇呢啲嘢？

由幾個心理現象開始講起：

1. 因為不安焦慮，所以逃避某些資訊、人物、環境，以達致短暫嘅平靜係唔長久嘅；相反，只會慢慢加強咗對呢啲人事物嘅恐懼，而且會誤以為自己冇能力承受恐懼所帶嚟嘅身心反應。

2. 反覆回想事件某些片段或畫面，不斷思索點解，模糊地想像最壞嘅情況，反芻，loop 住，心理學叫呢啲做 ruminations。不斷重覆睇同一類嘅片段，嚴格嚟講，都算係 ruminations 嘅一種。有研究發現喺不幸事件發生後，反覆 loop 住越多嘅人，越有可能將來發展出後創傷症候群（PTSD) 。

3. 獲取足夠嘅資訊，了解事件嘅前因後果同事件經過嘅細節，會幫助將不安嘅身心反應整合，慢慢變成淡淡嘅記憶。

故此，就係要睇乜唔睇乜，同點樣睇。

唔睇： 重覆某一個片段、影象、聲音、畫面。再睇都唔會令你知道更多嘅嘢。

睇：了解事件嘅前因後果，越全面越好。

點睇：自限每日大概 20 分鐘嘅時段去追看各種資訊；其餘時間，無論係咁啱諗起，或 IG 彈出，望一望，叫自己留番嗰 20 分鐘時段至追。有啲人會訂一日幾個短啲嘅時段都得；但目的係限制自己唔好冇節制咁睇。

睇，固然會唔開心唔舒服，學習接納自己有呢啲唔好嘅感覺，會嚟，又會過。

希望所有人都平安。