用力吐，盡力訴

好多人覺得心理治療就係聽人傾訴。入行到而家，經常會有人問：『你接收咗咁多負能量，點平衡自己？』亦有人覺得唔駛見心理治療，因為只係揾人傾訴吓。

首先，心理治療唔係猛咁叫人傾訴。

心理學雖然以前有一個名詞叫 catharsis，之後又有 ventilation，大致嘅意思就係假設啲人有好多壓抑，只要鼓勵佢哋用力吐盡力訴，就可以達致治療嘅效果；但係，研究發現，單靠傾訴，特別係過份吐訴，係唔可以解決問題，甚至可以令問題惡化。

一個患有抑鬱症嘅人，不斷訴說佢有幾慘有幾灰，只會一直喺個抑鬱漩渦轉下去不能自拔，因為抑鬱嘅心理狀態就係傾向睇到壞嘅方面諗負面嘅嘢。我見過好幾個外籍人士，佢哋嚟香港之前見過好幾年嘅輔導，以前嘅經歷創傷琅琅上口，甚至連從母體出生時嘅所謂創傷都計埋，但嚟到見我嘅時候依然抑鬱。聽抑鬱嘅人傾訴，最終，係要引導佢哋同負面想法保持距離，起動生活向前看，而唔係喺失落迷惘絕望無助傷感中兜兜轉轉。

脾氣暴躁嘅人，如果俾個枕頭佢打鬧盡情發洩忿懣，最終佢只係更容易用發嬲嚟處理問題。聽佢哋傾訴，係幫助佢哋揾出同表達忿怒背後嘅真正情緒，可能係無數嘅挫敗感受傷害軟弱恐懼等等，最終，要幫助佢哋用一啲更合理嘅方法處理呢啲情緒。

患有後創傷壓力症候群，如果只係不斷重覆零碎嘅恐怖片段，係會令佢心靈創完又創；相反，透過傾訴引導佢重組事件同自己反應嘅各方面資訊，有利於理解所發生嘅事，同時慢慢減輕回溯時嘅生理亢奮，揾出並學習點去彌補失落咗嘅情緒需要。

過份憂慮嘅焦慮症患者，佢哋重覆嘅憂慮通常都係兜轉於空泛嘅慘弊死苦當中，喺永無止境嘅漩渦中掙扎。聽佢哋傾吐係要幫佢哋諗清楚佢哋具體驚啲乜，有幾大機會會發生，如果發生可以點處理，學習接納人生唔確定嘅感覺，適當咁停止腦裡面轉圈，活在當下。

同理心嘅聆聽，接納感受，係必需但唔足夠。傾吐，係要有方向至有用，朋友嘅傾訴可以漫無目的，但心理治療嘅傾吐係根據當事人嘅心理狀況而作出適當嘅引導。

所以，做咗咁多年臨床心理學家聽咁多人訴苦，我從來都唔覺得只係接收咗負能量，因為佢哋嘅傾吐係會令佢哋突破自己，傾訴只係一個橋樑。